آپ کے ہاں کون سا بلاول راگ ہے؟

1,425

پچھلے دنوں لندن میں ہندوستانی کلاسیکی موسیقی کی ایک تقریب میں جانا ہوا۔ میں آنکھیں بند کئے ایک راگ میں غرق تھا کہ میرے ساتھ بیٹھے ہوئے میرے ہندوستانی صحافی دوست بیدی نے میرے شانے کو ہلکا سا جھنجھوڑا اور سوال کیا کہ جانتے ہو یہ کون سا راگ ہے؟ میں نے اپنی لا علمی کا اظہار کیا۔ میرے کان میں کہنے لگے یہ راگ بلاول ہے۔ راگ بلاول الہایہ۔

اسی دوران راگ ختم ہوا اور وقفہ ہوا۔ ہم دونوں چائے کی میز پر بیٹھے تھے کہ بیدی نے راگ بلاول کی شان میں اپنا راگ چھیڑ دیا۔ کہنے لگے راگ بلاول، شمالی ہند کی موسیقی میں 19 ویں صدی میں بنیادی راگ کے طور پر بہت مقبول ہوا تھا۔ یہ راگ مغربی موسیقی کے C Magor سے ہم آہنگ ہے۔ اور صبح کا راگ ہے۔

بیدی کہہ رہے تھے کہ ہندوستان کا قومی ترانہ ” جنا گنا منا” کی دھن بلاول راگ میں ہے اور سکھوں کی مقدس کتاب گرنتھ صاحب میں 170 بھجن راگ بلاول میں ہیں۔ بلاول ٹھاٹ میں گیارہ راگ ہیں جن میں سب سے زیادہ مقبول یہی بلاول الہایہ ہے جو ہم نے ابھی سنا تھا۔

میں اپنی کم علمی کی حیرت میں ڈوبا ہوا بیدی کی باتیں ہمہ تن گوش سن رہا تھا۔ بیدی کو بھی اپنی موسیقی کی جانکاری سے مجھے مرعوب کرنے کا اچھا موقع ملا تھا۔ کہنے لگے کہ آگرہ گھرانے کے مشہور گا ئیک استاد فیاض خان نے بلاول کے کھماج میں ” پیا توری ترچھی نجرلاگے پیاری ” گایا ہے اور یہ بو ل بھی بلاول راگ میں گایا ہے ” بڑا نٹ کھٹ ہے کیا کرے یوشودا میاَ”۔

ustad fayaz khan

پھر کہنے لگے کہ ہندوستانی فلموں کے مشہور گانے بھی راگ بلاول میں ہیں۔ فلم دیوداس کا گانا ” وہ نہ آئیں گے پلٹ کر” فلم نورنگ کا گانا”آ دل سے دل ملا لے” اور فلم کوہ نور کا مشہور گانا، ” ڈھل چکی شامِ غم ” بھی بلاول راگ میں ہے۔

معلومات سے لدھی، بیدی کی باتیں میں بڑے انہماک سے سن رہا تھا کہ بیدی نے یہ سوال کر کے مجھے جھنجھوڑ دیا ” آپ کے ہاں بھی ایک بلاول ہے۔ وہ کون سا راگ ہے؟

آصف جیلانی لندن میں مقیم پاکستانی صحافی ہیں۔ انہوں نے اپنے صحافتی کرئیر کا آغاز امروز کراچی سے کیا۔ 1959ء سے 1965ء تک دہلی میں روزنامہ جنگ کے نمائندہ رہے۔ 1965ء کی پاک بھارت جنگ کے دوران انہیں دہلی کی تہاڑ جیل میں قید بھی کیا گیا۔ 1973ء سے 1983ء تک یہ روزنامہ جنگ لندن کے ایڈیٹر رہے۔ اس کے بعد بی بی سی اردو سے منسلک ہو گئے اور 2010ء تک وہاں بطور پروڈیوسر اپنے فرائض انجام دیتے رہے۔ اب یہ ریٹائرمنٹ کے بعد کالم نگاری کر رہے ہیں۔

شاید آپ یہ بھی پسند کریں مصنف سے زیادہ

3 تبصرے

  1. Awais Ahmad کہتے ہیں

    ہاہاہا بہت خوب۔

  2. kamran کہتے ہیں

    Woh Raag nahi Taal Haay….

  3. moviesbelt.com کہتے ہیں

    bohat he umda , hehe

تبصرے بند ہیں.